تسجيل الدخول




تذكرنى
زائر جديد

 


العودة   منتديات نجوم ليبيا > منتدى الشعر والأدب > قسم شتاوي ليبية شتاوي وغناوي علم ليبية

غناوي الرحى - موسوعة اغاني الرحي

غناوي وشتاوي الرحي - غناوي الرحي اغاني الرحا - "غناوي الرحى" موسوعة 1) هلي طلب يطلب الله   يقول يا كريم المعاطي والعبد خليــــك منـــا   لا

إنشاء موضوع جديد  إضافة رد
 
LinkBack أدوات الموضوع تقييم الموضوع انواع عرض الموضوع
قديم 05-30-2012, 10:24 AM   رقم المشاركة : [1]
الصورة الرمزية غلا بنغازي
 

غلا بنغازي is on a distinguished road


غناوي وشتاوي الرحي - غناوي الرحي

اغاني الرحا - "غناوي الرحى" موسوعة


1) هلي طلب يطلب الله   يقول يا كريم المعاطي
والعبد خليــــك منـــا   لا يشيعك لا يواطئ

2) سوال النبي يا معدي   على الجار وصا نبينا
ولا حد قسما على حد   غير ونسه الدار زينة


3) وين ما بكي عيل الجار   حليب الشوايل مشالة
وين ما قعد طايح الدار  حبس الأولى لين شالة

4) القافلـــــــــــــة الأوليــــــة   فيهــــا مليــــــح يـــداري
برك جمالة على ظهر   وقال بر عتوا للضراري

5) نوض يا ولد وأسهر الليل   ودير العشم في ذراعك
ورانك تصاحب الخاين   كان قابلة سوم باعك

6) دم الــــردي مــــــــــا يــونس   واصنتـــواياجماعــــة
واللي خذي القول في خوه   كيف من نتش من ذراعه

7) واحد توكل على الله   واحد وكيله ذراعه
واللي توكل على الله   شرا العز والذل باعه

8) أوقات في الصبر عله   وأوقات يبري العلايل
وأوقات حملك تقله   وتزيد فوقه عدايل

9) العين للعين ميزان   والقلب للقلب راجع
وبنادم يجيبوه الإحسان   ويبعدوه المواجع


10) يا صاحبي ما يغرك   اللي يضحكو ما يدومو
والحوت في الموج عوام  وهما بلا ماء مايعومو

11) ليا غلقت الباب طيبة   ما يغلق الله بابه
يجي من هداني الغيبة   شئ ماقرينا حسابه

12) لا تهربوا ولا تذلوا   اللي مصوره الله جايز
ومن سيله لا تولوا   طفح لين فات الركايز

13) لا تهربوا ولا تذلوا   يامدرجحين الأكمامي
رآهم وراكم يعلو   والموت راهو قسامي

14) اللي ما قري ما عرف فرض   ولو يتوب مازال جاهل
واللي ما مشي ما عرف الأرض   ولا يوردك عالمناهل

15) الذلال ما هوش محسوب   غير عيلته حاسباته
كان مات ما هوش مرحوم   وكان عاش كده حياته

16) نوصيك على سابق الخيل   والبندقة اللي قصودة
وأنشد على بنت الأجواد   ضناها يجو لجدوده

17) ما يرقد الليل مديون   ولا يحمل الذل مانع
ولا يغسل العرض صابون   ولا ينجر القلب صانع

18) السعد تبديل الأقدام   والصبر كنز الفقاري
والصمت سلطان الأحكام   والجار صابون جاره

19) أن شاكيت شاكي منو وازن   وأما خصيص العقل ما تشكيله
حتى الجمل كان الغرارة زقلة   محال ماتتبت عليه عديله


20) أنســــــــــى الطمــــــــــع   ينســاك فقـر الدنيـــــــــا
وأحفر علــــــــــــــــــــــى ساسك   وجدد بنيــــــــــــــــــــا

21) الإسعاد ماهي بالأجهاد   ولاهي بكبر الجهامة
ولا صايبه فـــــــــــــــــرغت زاد   ولا صبر عقبه ندامة

22) الصاحب على الصاحب يلز الحربة   يهون اللحم ويهون عمر فاني
والصاحب اللي مايلتقه في الكربة   خليك منا صحبته لا قاني

23) في الواسعـــــــــــة   الأصحــــــاب يا ما منهــــم
وفي الضيـــــــــــــــــــــق   ما تلقاش واحد منهم

24) اللي بني يعرض الساس   يصب الحجر شغل قوة
واللي عرف يعرف الناس   أهل الكرم والمروة

25) فيه ناس   تقعد ناس ديمة ديمة
وفيه ناس   يظلمها الخير ظليمة

26) بنادم ليا ضاق صبره   والأوجاع ما طاق داها
الأيام تمرض وتبري   والصبر هو دواها

27) صبرنا وجي صبرنا خير   واللي قسملك تناله
وحبيبك ليا كان يبغيك   هو اللي يقولك تعالي

28) العين تنظر   والعقول توازن
والوذن تسمع   والقلوب مخازن

29) كبر التبرييف للباف   وطول الخطا للنعامة
وبنادم ليا كان عراف   شكار روحه ذمامه


30) ما فيش في الناس متموم   ولا في الشتاء ليل دافئ
ولا في البحر بئر معلوم   ولا في العدو قلب صافي

فن شعبي يخص المرأه ان لم نوثقه ذهب ادراج الرياح في عصر العولمه

حاولت في هذا الموضوع جمع معلومات عن غناوى الرحى

وجمع الغناوي بطبع وتنسيقها في شكل ملائم للقارئ

غناوي او هجاوي الرحى أشعار حكر على المرأة ...

فقبل ظهور المطاحن الحديثة كانت المرأة تعاني الكثير من التعب ..
وتبذل الجهد العرمرم .. في إدارة الرحى بواسطة يد تصنع من الخشب ..
تسمى الشظ .. فقد كانت تسلي نفسها أثناء إدارة الرحى بالغناء ..
فيخرج النغم مختلطاَ بصوت الرحى ..
ومن يسمعه يجد فيه الكثير من التعبير عن التعب والمشقة الذي تلاقيه المرأة ..
ومن أغاني المرأة على الرحى يظهر الرمز واضحاَ ...
وفي بعضها يظهر المعنى واضحاَ ودون استعمال الرمز ..
وفي معظمه الشكوى من تعب إدارة الرحى .. أو ما تلاقيه المرأة وهي حساسة جداَ ..
بطبيعتها التي حباها أو ميزها رب العالمين بها .. من فراق الحبيب ..
وبعده عنها .. فنجد كثيراَ من الأغاني تعبر فيها المرأة عن الحب الوطن والأسرة و البكاء ..
على الأطلال ..

ففي هذه الأغنية التي تقول

الله يعينهم لولاف أخطروا عاونوني ع الرحى ...


تدعو المرأة الله لأن يعيش حبيبها الذي ذكرته أثناء إدارة الرحى ..

فكأنه قام بمعاونتها بذكرها له ..


الله يعِيْنهم لَوْلاف اخْطَروا عاونَوْني عَ الرّحَىَ.

اخْذِي الليل بالساعات اسْمُوْر نَيْن يا لِيْد تَطْحَني.

اطْرِي بعِيْد ياك ايْحِيْد النَّوْم يا رحَىَ دَوْرَد عَلَيْ.

اللي اتْكِيْد في البَذّار تكامَل عَلى ايْدي رَمُوْها.

القَمْح والشّعِيْر اَرْدَاع تَلْقَيْه يا رحَىَ في شهادْتِك..؟!

تحْسَابَي الليل طوِيل الفَجْر جاك بَوْقَة يا رحَىَ.

لَيْش يا شعِيْر اتْدِيْر سمار وانْت عابِي عَ الحَسَك.

لِيْد ما اتْجِي للنار محا ذنُوبْها ضَيْم الرّحَى.

مازال الشّعِيْر شعِيْر عَلَيْه لُو جَرَى سَيل الولي.

نَقِّي وسَرّبي يا لِيْد المَيْر لا يداعِيك عَ الغَثَر.

اشْظَيْظ الرّحَى كّذّاب يْشاكِيْ بشِيْ مَو صايْده.

لُو كان الشّعِيْر ايْدِيْر قْصُور يا رحَى راك بانْية.

اِن جاك الشّعِيْر اكْلِيْه حِنِّي عَلَيْه مَيْ ساعة عَدَد.

واجِد تمَنَّيْناك سنَة المَيْر يا ضَيْم الرّحَى.

ازْعَمَا يا كلَل لِيْدَيْن برَاد حَيل والاّ م الرّحَى.

قلِيل يا شعِيْر نجاك احْصلْت بَيْن لِيْدَيْن والرّحَى.

وأخرى تتحدث إلى يديها اللتين تألمتا من إدارة الرحى ..

عن البيوت التي كانت عامرة بأصحابها وأصبحت خراباَ ..

اللي واجع اليدين خرابات بعد زين يارحى ...

ويقول أحمد يوسف عن الرحي :
إن الرّحَىَ ليست مُجرَّد آلة خشنة ثقيلة.. إنها أحد مُتنفّسات المرأة في البادية..
فالمرأة الليبية البدوية "تَفْزَع" في كثيرٍ من الأحيان إلى ضجيج الرّحَىَ..!
خاصة في سكون الليل.. على ضوء الفنار.. حيث يتماهَى الصوت البَشَري..
الأَنِيْن الأُنثَوي الحزين مع صوت الحَجَر.. وصوت القمح المَج راجل يعجبكوش:

نا العَيْن وانْتُو نظَرْها ونا لِيْد وانْتُو لصابِعْ.

ونا لَرْض وانْتُو مطَرْها بلاكَم اتْصِيْف المرابِعْ.

اِن كان رَبِّي عَطَاك يعِيْنَك عَلَى الدَّهر دِيْمة.

ترْمِي عَصَاتَك من اِيْدَك عَوْجا توَلِّي سقِيْمة.

الابِل طْوال العَرَاقِيْب وَيْن شَيّعَت ما تْواطي.

تطْوِي الوطَا طَيّ في طَيّ طَيّة طوِيل البْسَاطي

امْصَبِّي عَلَيْ واسِع الجال ويقُول زِيْدي بلُوله.

يَشْبَع اللي كان جَيْعان وان غاب جارْهم يرسلُوا له.

اللي طلَب يطْلِب الله ويقُول يا كرِيْم المعاطي.

والعَبْد خَلِّيك منّه لا يرفعَك لا يواطي.

زِيْن النّخَل في العَرَاجِيْن وزِيْن المْرَا في السّوالِف.

وزِيْن الذّهَب في الموازِيْن اِن كان طاح في ايْدَيْن عارِف.

يا رَيتْنا ما ضنَيْنا وَقتاً نوَيْنا الفْراقي.

واللي ضنَىَ ما تهَنّا واللي ما ضنَىَ بات شاقي.

لَولاد ما يعملوا خَيْر ورَبَّيتّم نَيْن صارَوا.

وانْهَفِّت عَلَيْهم كما الطَّيْر ووَيْن نَبّتَوا الرِّيْش طارَوا.

ناري عَلَى اللي غَرِيْب في بلاد ما هي بلاده.

والفَم يَضْحَك ويَلْعَب والقَلْب صابِغ سوَاده.

ما يَوْجْعَك غَيْر من مات ودَانَوا عَلَيْه اللحايد.

كَلاّ غَرِيْب البلادات يعَاوِد بْطُول المدَايد.

يا طالْعاً فَوْق في الجَوّ ابْنِي عَلَىَ الصِّحّ ساسَك.

ويا حارِث الشَّوك مِن تَوّ اتْشُوف العَجَب في دْرَاسَك.

فاعل الخَيْر هَنِّيْه وبالفَرْح تَزْهَىَ ايّامه.

وفاعل الشَّرّ عَزِّيْه توَلِّي عَلَيْه النّدامة.

يا رَيتني طَيْر ونْطِيْر وجناحي عَلَيْ لَرْض هافي.

انْجي لغَوْشكَم يا غَوالي انْمَيْعِد ونَقلَع ارْيافي.

والشايلة شَمّلَوها ملَت ضَرْعها بالشّمَالي.

والحايلة سَفّرَوها جابَت لذِيْذ الوْكالي.

القَلْب صَنْدوق للدَّسّ وعِلّة البنادِم لسانه.

والوذْن تَسْمَع الحِسّ والعَيْن تنْظِر بيَانه.

يا سعَد مَن غايْبه جاه ويا فَرحته يا دلاله.

ونا غايْبي طال مَرْجاه مشْتاقَة لتَوقة خَيَاله.

وهذه امرأة عمياء تخاطب أطفالاً يلعبون إلى جانبها:

يا عوَينكَم يا اعْوَيلة اللي صايدِيْن العَوَافي.

اللي تنظروا في بعَضْكَم واللي ترقدوا الليل وافي.

شَيْناه يا قِلّة المال ودَيْن الرّجال الشّحايِحْ.

اِيْواطِي الباهي العَصْرَان وشَيْبه بلا كبْر لايِحْ.

يا رَبّ خَلِّصْ عَلَيْ خَيْر نَيْن نخلْصُوا مِن جبَاهم.

ناسَاً تحَاحِي عَلَى الطَّيْر مِن خَوف ياكِل عَشَاهم.

اَجْعَل كلّ مَمْدود مَرْدود واجْعَل كلّ عَوجَا سقِيْمة.

واَجْعَل اخْطُوْرهم أَوْلافي معَا هَبّ لَرْياح دِيْمة.

البَيْت لُولا استَارَه يقِلّه نسُوم الهَبايب.

والنَّجْع لُولا اكْبَارَه ما ينْقدِع فِيْه عايب.

ما كَيْف خَيلهم خَيل دِيْمة عَلَفِّن بْزايد.

أَصايل اسْمَاح الصّهِيل ايْجَلَّن عَلَيك الغَدَايد.

حاذي المساعِيْد تَسْعَد حَتَّى بمَشْيَك معاهم.

وان كان حاذَيْت لَنْذال ايْغَبَىَ صوابَك احْذاهم.

ما يقْعدَن غَيْر لَصْيَات شَيْنات والاّ امْلاَحي.

لا سْبِد مِن قَولْهم مات أَمّا امْرَاض والاّ جْراحي.

نا اكْبرتْ واحْدَاب ظَهْري وعَيْني حَوَتّا ضبَابَة.

وازْعَمَا راه وَيْن قَبْري وفي وَيْن قِبلة ترابَه.

نا داي لُو صادَف اجْبَال اطْوَال عالْيات القنَايف.

يَبْقَن ضحاضِيْح ورْمال وهِن قَبل مَنْجىَ الخايف.

العَيْن للعَيْن مِيْزان والقَلْب للقَلْب راجِع.

بْنادِم ايْجِي بلَحْسان ويْبَاعْدَنّه امْواجِع.

و هذه المرأه تشتكي فارق الغاليه ولدتها وظلم الاقرباء

يا سعد من قال أمي ومن بيتها واجباته

تاريك يا ام جنه يا تعس من فارقاته

اخيه مامر ريقي واحيه ماحر دايا

واللي حسبته حبيبي ظهر عدو من ورايا

يا ميمتي يا وديده يا غاليا ما تهوني

جيتي عليا بعيده لمني تشيع عيوني

يا حاسه اللي انحسه يا ساهر الليل دوني

يا ميمتي لو نشاكيك نخبرك ما طرالي

نسقط عيوني نبكيك وانسهرك ليالي

بيت الام مهدوم وجامع بلا بوها خالي

ورزق الا بلا خوي مقسوم يصفى قليل اللمالي

يا ميمتي يا وديده يا غاليه في الضماير

سوال النبي والعقيده تعالينا يوم زاير

بو سرج فضه وبو فرس مريوحه

ياناس خلوله الطريق بروحه

ياطير ياطاير لي السماء توطى نزيدك رويشه

وعلي قد ريشك احجابات ونجيك ياسيد عيشه

ياريت خوتي ثلاثين واولا عمّي بزايد

ما ياكلوا لقمة الدين ولا يلبسوا جرد بايد

يا خوي كانك وخيّ إنت الراي وانا الدباره

كانك وخي النساوين حتى غلاي خساره

عيني تراجي في الفرس وسيده

مراجات قايد من بلاد بعيده

ياعين عوتدك بشبح الغالي

هبل من هبل ما دار كيف هبالي

الحب مادارلي شيء والكره مادار حاجة

نقعد عليكم كما البي سلطان واخذ مجازة

تريت المحبة تشرهيب والمعرفة بالجلاوي

سية حبيبي كما جرح هلٌي ماله مداوي

لا قابلوا شبح لا نبح ولا من يدل الذهيبة

كان القطا داير الحس والريم داير جليبة

مايوجعك غير اللي مات وحازم عليه اللحايد

كلا بعيد الجوابات ايروح بطول المدايد

الثلب لو شاب وحداب وطال السفر بالمعاشي

بيعيه ياصاحب النــاب وخــودي بحقه حواشي


هني صحبتنا تحاكي ريافها على الغايب المنتظر فلذة كبدها

أنا القلب بايت يخمم والعين باتت سمورة’

على حيكم يا عزيزين يالندرة وين شورةْ

سريرن ذهب لريلي فيه وسمس الضحى فيه غابت

جي دونكم يا بعيدين وكبدي من الوحش طابت

هيا نجوم الثريا زعم السزي وين داره

وكال عشب الحنية وقاد للشيخ ناره

ما فيه غير عجاجات والا الغربة يحومن

اللي حازكم يا عزيزين انظاري على من يومن

يا عين خيرك ترفي انشاء الله خبر خير دايم

ومطول دموعكم تشفى جباهلك ما بي ايلايم

القيت دارهم بالحلاويق ومراحهم لوَّلاني

حدر دمع عيني دلافين لوما لزمته عماني

مثلتكن يا عيوني كيف الشنان البايد

رشاشيح ما وصلن وهلنا بعاد الردايد

ساهيتكن يا عيوني باشي تصبرن عن فراقه

كفوا الدمع وارحموني محال نبدو رفاقه

زعم يا الغايب تجينا بعد طولت الوحش بيّه

من الدمع رانا هفينا روينا الصحارى أميّه

يا ريتني ما عرفته ولا شبّلي ليه خاطر

تباعد على شبحت العين وخلى دموعي قواطر

يا درانا وين جيتك عليّ خطر زول غالي

ويا ريتني ما لقيتك انحسه اريافي لجالي

اثبتن واشبحن زين طلحات والا بعاير

ولا كان ريتن الغالي يا ما لكَنْ من بشاير

صبرتهن ما نفع صبر كففتهن جنِّي ذوارف

عميّات بالدمع لنظار يبكن اللي موش عارف

لي عين بالدمع تنهال ولي قلب كاتر خيابا

على ونس غالي على البال واليوم دونا مجابا

رحلتو وخليتو زهاوي بالي

ونبي المحطة في القطا من تالي

عندى قلب ما يحمل بلاك

وعندى عين جافيها النوم

وعندى كبد ذوبها غلاك

وعندى عقل ركبنى اهموم

وعندى صبر كملتا امعاك

وعندى عزم جافنى اليوم

وعندى عمر عدا فى رجاك

وعندى لهفة اتشوفك كل يوم

بلاه ما يسير طحين ..... القلب راه ريسوم الرحا

وهذه مجموعه هجاوي من ما تغنت به امهاتنا لتبعد الكلل وتهون عليها

تعدرت ماجابهم عدر وحلفت ماصدقوني

وقولولهم يطلقو النار وكان يقدرو يحرقوني

ياقلب يامذهب الكلب غير ليه ماتكافي بنادم

لانك اصغير ويوروك ولانكش في الراي عادم

إن عاب صاحب لا تعابيه راه صاحب العيب نادم

إيزل القلم فيد قاريه يابال عقل البنادم

ما يعجبنك تباريق دون ما ادوس الدخايس

راه ولد سقطة الريق أتجيبك لدار النقايص

يا فاعل الخير لاقيه ويا فاعل الشر نادم

اللي يعابيك لا تعيبه راه صاحب العيب نادم

يا حاج لو ريت هلنا زينين ماهم وعـارا

ما يضربوا غير بالسـيف ويتحزموا ع الغــدارا

هلنا وضناوين هلنا وهات قرعتك يا معاشي

هلنا اليا صار ما صار ايجو معريين الشواشي



ykh,d hgvpn - l,s,um hyhkd hgvpd hgvdp ykh,n


أكتب تعليق على الموضوع مستخدماً حساب الفيس بوك

تسهيلاً لزوارنا الكرام يمكنكم الرد ومشاركتنا فى الموضوع
بإستخدام حسابكم على موقع التواصل الإجتماعى الفيس بوك


up09

غلا بنغازي غير متواجد حالياً   رد مع اقتباس
قديم 05-30-2012, 02:17 PM   رقم المشاركة : [2]
الصورة الرمزية غزال اجدابيا
 

غزال اجدابيا will become famous soon enough

مشكوره على المجهود خيتي وربي يحفظك
وغناوي الرحى او الرباعيات الشعرية من الروائع في الشعر الشعبي

وهذين ع الصبر
الصبر هو طب الاوجاع والصمت يقهر العادي .. واللي ترك باب الاطماع تحبه جميع العبادي

نرقد على الشوك عريان ونضحك مع اللي جفاني .. ونصبر على طول الايام نين تستوي يازماني



تحياتي ليكي
تقبلي مروري
غزال اجدابيا غير متواجد حالياً   رد مع اقتباس
إنشاء موضوع جديد  إضافة رد

مواقع النشر (المفضلة)

الكلمات الدليلية (Tags)
موسوعة, الريح, اغاني, غناوى

جديد منتدى قسم شتاوي ليبية شتاوي وغناوي علم ليبية

« غناوي الرحى2 - موسوعة اغاني الرحي 2 | شتاوي بنات غناوي بنات غناوي ع البنات ليبيا شتاوي ليبية ( زمان البنات إيغنن إيقولن ) »
أدوات الموضوع
انواع عرض الموضوع تقييم هذا الموضوع
تقييم هذا الموضوع:

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

كود [IMG]متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
اغاني راب اغاني بالتي راب تونسي 2012 غنية بالتي غنية بالتي صوري روحك - غنية بالتي البارح كونا صغار2012 العراب اغاني الراب 3 06-05-2012 06:34 PM
غناوي الرحى2 - موسوعة اغاني الرحي 2 غلا بنغازي قسم شتاوي ليبية شتاوي وغناوي علم ليبية 0 05-30-2012 10:26 AM
اغاني نجيب الهوش - اغاني ليبية - نجيب الهوش - جديد نجيب الهوش 0 يا مجربين الحب ما تلوموني اغاني ليبية حصريا نجوم ليبيا العراب اغاني ليبية 1 01-24-2012 06:53 AM
مفتاح امعيلف ( نشكيلك عقلي مليان ) اغاني مفتاح امعيلف - اغاني ليبية - جديد مفتاح معيلف - جديد اغاني امعليف حصريا العراب اغاني ليبية 1 01-21-2012 05:13 PM
تحميل اغاني اصالة نصري& حسين الجسمي الفرس 2010 mp3 - اغاني خليجية 2010 لمكسد اغاني عربية 0 12-02-2010 11:53 AM


الساعة معتمدة بتوقيت جرينتش +2 . الساعة الآن 06:46 AM
التعليقات المنشورة لا تعبر عن رأي موقع نجوم ليبيا ولا نتحمل أي مسؤولية قانونية حيال ذلك (ويتحمل كاتبها مسؤولية النشر)


.
جميع الحقوق محفوظه نجوم ليبيا


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144